• Síguenos:

Vía libre para Feijóo 

 

Logo de que o lehendakari establecese a data das eleccións galegas, pódese concluír que, aproveitando que o Miño pasa por Ourense, ao presidente Feijóo veulle que nin pintado o pretexto para adiantar un mes as eleccións. O argumento da "responsabilidade" e da "estabilidade" resulta moi cuestionable, porque outros argumentos (a personalidade de Galicia, sen ir máis lonxe) reclamarían criterio, espazo e tempo propios.

Mais non é a data das eleccións o máis relevante no actual contexto político galego, tan determinado polo bloqueo e a incerteza en Madrid. O verdadeiramente importante é que a dereita galega volve ás urnas agrupada sen fendas arredor de Feijoo, mentres que a esquerda presentará cando menos tres candidatos e aínda cabe que sexan catro, se Podemos optase por acudir ás urnas á marxe das mareas.

Esa é a gran baza coa que xoga Feijóo nos comicios de setembro. A mesma que vén utilizando ultimamente e que tan bos resultados está a lle prestar. Hai tempo que xa non se discute nin se replica o que neste momento debería ser o núcleo da axenda política: a xestión do presidente durante este seu segundo mandato.

Esa falta de oposición reflicte non só a división da esquerda, senón a propia debilidade interna de PsdeG, Bloque, Podemos e mareas. O adianto electoral dificulta aínda máis a recomposición do labirinto Anova-EU-Mareas-Podemos, cheo de incógnitas, sobrado de retórica, falto de liderado e orfo de programa alternativo para enfrontar, con realismo e pragmatismo, os problemas "da xente".

Feijóo ten a tiro a maioría absoluta e vai por ela. Sería un éxito incontestable que reforzaría a súa aínda non de todo pechada "opción Madrid", nun hipotético relevo do plasmático presidente en funcións, Mariano Rajoy.

Se non conseguise esa maioría, a realidade, a día de hoxe, é que costa traballo albiscar outra opción viable. Demasiado verde. Demasiados vimbios para facer o cesto. Polo pronto, Feijóo xa deixou ver que o seu branco predilecto durante a campaña vai ser ese espazo da esquerda mareas/Podemos, aproveitando o seu precario estado. Por se houbese dúbidas, esta semana o presidente declarou que, chegado o momento, falaría cos socialistas para que lle facilitasen un goberno se non alcanza a maioría absoluta. Sóalles? Ninguneo do PsdeG, sacado do centro do escenario e reducido a posible "muleta" da dereita. Leiceaga ten tarefa dabondo.

Federico Cocho

Enviaremos un mensaje al correo indicado con el enlace que deberás clicar para completar el alta. No recibirás ningún boletín hasta entonces. Política de privacidad