• Síguenos:

Treboada socialista e outros desacougos políticos do país 

A pouco máis dun ano para que se renove a Xunta, Galicia non ten candidato ningún para presidila. Por unhas ou outras causas, o certo é que a inestabilidade política ambiental reflíctese tamén no desacougo xeneralizado de partidos, coalicións e outras formacións aspirantes a ocuparen a poltrona en Santiago.

Á esquerda do PSOE quedan meses de mareas, con marusías incluídas, ata que se remansen as augas e se saiba como se artella ou artellan finalmente as distintas opcións (candidaturas populares, que lles chaman) sobre as que agora se debate con paixón. Vellos (IU, BNG) e novos actores políticos (Podemos, Mareas), xunto cos respectivos anexos, variantes e disidentes, ofrecen hoxe un panorama moi confuso e mediatizado pola estación intermedia das eleccións xerais.

Tampouco se sabe quen liderará a candidatura do Partido Popular, con moito a forza máis potente do panorama político galego. Non está claro se volverá ser o propio Feijoo, sempre cun pé en Madrid e mirando de esguello como sopra o nordés pola Moncloa e polo cuartel xeral da rúa Génova.

Ao presidente Feijoo seica lle preocupan os nubeiros de tronada estacionados xusto enriba da parroquia socialista por mor da incansable, imprevisible, interminable e por veces inintelixible xuíza que leva anos e anos a remexer –entre outros sitios– na trastenda da xestión municipal do PSOE en Lugo, nunha insólita instrución digna de estudo nos congresos internacionais de Dereito Procesual.

"Preocúpalle" o futuro do PSOE. Dío por lle meter un ferrete ao rival, o señor Gómez Besteiro, ao que, si, semella que máis lle valería ir ofrecido de xeonllos á Nosa Señora dos Milagres de Monte Medo ou a outro centro reemisor de bondades celestiais que lle caia máis a man, que a oferta romeira non falta e niso si que somos potencia global.

Mais certa razón ten o señor presidente. O líder socialista acaba de ser imputado, de modo que á súa formación se lle presenta un feo escenario inmediato. El agarda que este mesmo mes o desimputen e todo quede nunha treboada de verán. Pode. De momento, o seu liderado sofre unha grave acometida externa e interna, apenas uns días despois do "affaire" doméstico que rematou coa perda da Deputación de Lugo. O socialismo galego, inestable de seu, non precisa moitas cargas máis para que se reabran feridas, se reaviven loitas e ambicións nunca ben extinguidas e se monte un novo cacao familiar, deses aos que son tan propensos no PSdG.

De resultas, a esquerda moderada que representa o PSdG-PSOE volvería quedar ao pairo, sen o liderado forte preciso para enfrontar cunha mínima solvencia nas urnas a crecida das mareas. Ou non? Ben, xa apareceu nas pantallas o nome do ex ministro José Blanco (si, segue por aí), que conta con influentes apoios mediáticos.

Mais algo terá que dicir o líder local de máis peso político no momento, que non é outro que o alcalde de Vigo, Abel Caballero. Primeiro, por iso mesmo, por ser o alcalde da maior cidade galega. E segundo, porque conta co aval dunha incontestable e abraiante vitoria electoral, coa que esnaquizou a dereita, as mareas, os nacionalistas e todo canto se lle puxo por diante. Caballero non vai ser candidato (que xa o foi e xa fracasou), pero algo terá que opinar, sen dúbida.

Se o de Besteiro non se pecha axiña cunha desimputación, chegará o momento de mover os seus peóns. Xente como, por exemplo, M.ª José Caride, ex conselleira de Política Territorial, recentemente repescada para o seu equipo municipal. Hai partido.

Federico Cocho

Enviaremos un mensaje al correo indicado con el enlace que deberás clicar para completar el alta. No recibirás ningún boletín hasta entonces. Política de privacidad